Concept da la Convegno

Las midadas digitalas penetreschan entant tut ils secturs da nossa societad e midan dapi ils ultims dus decennis la convivenza e la communicaziun da maniera fundamentala. Da quai resultan dumondas davart la communicaziun linguistic-culturala e davart settings d’emprender correspundents. Il simposi spezialisà metta en il center las suandantas dumondas.

  • Tge potenzial han medias e resursas digitalas per l’emprender e l’instruir en contexts plurilings e multiculturals?
  • En tge moda ed en tge contexts d’acquist resp. d’emprender – formal, informal, nun-formal – vegnan duvradas medias digitalas per la communicaziun cultural-linguistica?
  • Co èn las experientschas cun concepts experimentads en la pratica areguard il diever da resursas digitalas per la promoziun da la plurilinguitad?
  • Tge sfidas sa dattan en la scolaziun ed en il perfecziunament da las docentas e dals docents sco era per la perscrutaziun ed il svilup?
  • Nua èn las sfidas e las ristgas da la digitalisaziun da contexts d’instruir e d’emprender en il champ da la plurilinguitad?

Purtaders da l’occurrenza èn las scolas autas da pedagogia dals trais chantuns Vallais, Grischun e Tessin. Sut il num « Convegno sul plurilinguismo » organiseschan ellas dapi 2012 en il ritmus da dus onns ina dieta davart la plurilinguitad. Cun l’organisaziun e la coordinaziun per il „Convegno“ dal 7. e 8 d’october 2021 a Brig s’occupa questa giada la SAP Vallais

Finamira da la dieta èsi da discutar questas dumondas tant cun contribuziuns teoretic-concepziunalas sco era empiricas e da la pratica e da mussar, discutar e sondar pussaivladads per il svilup e la promoziun da la plurilinguitad en il context da la digitalisaziun.

Public en mira: La dieta sa drizza a persunas d’instrucziun futuras ed a pratitgantas da tut ils stgalims da scola, a docentas e docents sco era a collavuraturas e collavuraturs scientifics da scolas autas. Plinavant era a manadras e manaders da curs e persunas responsablas dad instituziuns en ils champs lingua, ICT, interculturalitad e.a.

Program da la dieta: El cumpiglia referats, referats curts, workshops, stans da poster e da martgà sco era occasiuns da barat informals. La dieta duai porscher spazi per la discussiun e per activitads da rait. Ultra da contribuziuns scientificamain spezialisadas e didacticas, enritgeschan intervenziuns culturalas sco era excursiuns extra-muros il program da la dieta.

Medias digitalas, concepts didactics, instruments e metodas na muntan betg be l’accent tematic da la dieta davart la promoziun da la plurilinguitad, els fan era part da l’organisaziun da la dieta.

Lingua da la conferenza: Sco tar ils „Convegnos“ d’enfin ussa èn tudestg, franzos e talian da princip las linguas da contribuziun e da conferenza. Per las preschentaziuns durant la dieta èn planisads servetschs da support per la plurilinguitad (p.ex. documentaziun en scrit tar las contribuziuns da dieta en mintgamai duas linguas). Dumondas e contribuziuns da discussiun san ins far per tudestg, franzos, talian e rumantsch.

Publicaziun: Igl è previs da rimnar las contribuziuns da la dieta e da las metter a disposiziun en furma adattada al public ed a circuls d’expert interessads. La furma specifica (internet, registraziuns da video, cudesch da la dieta, carnet spezial en ina revista sco per exempel Babylonia 2/2022 e.a.) vegn anc precisada.

logo HEPVS PHVS complet

logo SUPSI 60mm ITALIANO

PHGR Logo CMYK